安平鎮黃屋个過往歷史

【文、圖∕徐貴榮∕國立中央大學客家語文暨社會科學學系兼任助理教授】

 

　　黃姓係大姓，在全國排第三，桃園排第二，平鎮區排第五，可見黃屋人口十分得人畏！平鎮个黃屋，在安平鎮庄个係廣東省鎮平（今蕉嶺）縣來个；在東勢个分別有梅縣、福建省詔安來个；在高山下、八角塘个係饒平來个。本報322期有紹介過八角塘黃屋「平鎮黃復興號兄弟同心」，該係饒平底个。至於安平鎮黃屋分大坑缺、矮崗仔兩位，雖然共樣係鎮平來个，毋過來台祖無共樣。

　　大坑缺个係18世黃乃揚、乃拔兩兄弟大約在清朝嘉慶年間，從廣東鎮平縣石窟來台灣，在淡水上陸過後，先到南崁開墾。毋過來个時節算慢吔，就搬到今這下个鎮興里新光路大坑缺一搭仔贌田耕，種茶生活，還過自家製茶買賣。煞猛打拚開墾慢慢仔有成功吔！19世黃宗康、黃宗漢在清朝末年開始起屋。宗漢降四个倈仔，除忒第三個標澄早亡以外，其他標清、標立、標成三兄弟在日本大正年間，同也係黃姓个大地主黃念初買地起公廳（圖1）。

圖1 鎮興里大坑缺「千頃世第」黃屋公廳（2013.09.11攝）

　　講着黃念初，根據當地文史工作者陳東亮个調查，佢本來安到黃娘盛，厥爸黃賢琛，係較早來到平鎮開發个大家族長、大地主，田地當闊，富甲一方，從附近仔南平路到瓦窯湖、中興路都有田地。平時畜當多承勞，也設有學堂教子弟詩書。故所黃娘盛家學淵源當深，字墨異飽，詩文書畫樣樣通。甲午戰爭滿清戰輸，台灣割分日本。第二年，日本人六月來到中壢、平鎮，黃娘盛、胡老錦帶領家丁、義勇軍，對日本軍開出第一銃，抵擋日本人來接收台灣，日本軍無想着台灣會有人抵抗，打幾下擺都打毋贏，死忒好多人！毋過日本人有大砲、銃子，這兜人奈毋何，敗忒過後，家財散忒，無人知黃娘盛走到哪去欸？聽講過忒兩三年，等到大局好勢，恬靜無問題吔！佢正偷偷仔走轉來，驚分日本人知着，改名安到「黃念初」。因為當有才學，黃姓又係望族，日本政府還分佢做安平鎮庄个庄長咧！

　　20世三兄弟分家過後，大個標清本本在舊公廳伙房，老弟標立、標成搬到鎮安宮廟面前个巷仔，標立起「千頃世第」（圖2），標成起「千頃第」（圖3）老屋。到這下鎮安宮廟面前的巷仔，做得看着有一排連等幾下間十分老舊个大瓦屋，總下係大坑缺黃屋後代子孫个住所。黃家當多个地，光復過過後，實行土地放領，正減少盡多。

圖2 二房「千頃世第」（2013.09.11攝）

圖3 三房「千頃第」（2013.09.11攝）

　　另外還有一位安到矮崗仔黃屋，係在安平鎮到掌路寮一搭仔，也就係這下个平鎮里南平路到縱貫路交接該位子。18世祖黃乃彥在清朝從廣東省鎮平縣來台，先到楊梅，後來搬到這搭仔起屋，經營茶米生理過磚窯廠，製茶加工，賣茶米。當時陸橋南路到南平路一搭仔，甚至到埔心、高山頂味全牧場，當多都係這黃屋个土地。

　　明治41（1908）年，日本人鐵路改線，愛同安平鎮停車場搬到草湳陂（今埔心），安到「草湳陂驛」，安平鎮無車頭吔！聽講在當地人士个遊說過黃姓人个熱心捐地之下，這隻車頭毋係在安平鎮，毋過離安平鎮界近近仔，還係安到「安平鎮驛」，可見當時黃姓人个好額同勢力。

　　（「安平鎮驛」大正9（1920）年，改名「平鎮驛」；「平鎮驛」民國44年3月初1改名「埔心車站」，有關詳情請看本刊330期〈埔心个過往今來〉）
　　
徐貴榮教授 聲檔 — 安平鎮黃屋个過往歷史（四縣腔）





　

▲BACK